قبر پاکین یاحسین مدّتدی کی ایستر کونول
زاره گلمیش بیر مقام آه و زار ایستر کونول
**********
معصیت کارم منه توفیقین هر گه یار اولور
نقطه‌ی مجرم گئد‌ر، دل محرم اسرار اولور
قبر اکبر عاشق منصوره پای دار اولور
پایدار اولماقلیقا بیر پای دار ایستر کونول
**********
کنج غمده بیر نفر یوخ منله هم آواز اولا
آز قالیبدیر مرغ روحیم جیسمد‌ن پرواز اولا
ایسته بو جانیم سر کویینده پای‌انداز اولا
دوت الیمد‌ن غم گونونده غمگسار ایستر کونول
**********
هر طرف اسکندر دل آب حیوان آختاریر
ظلمت غمده گدیر، لعل بدخشان آختاریر
جان وئر‌ن عاشق همیشه کوی جانان آختاریر
جان نثار ائتمک‌لیگه بیر جان نثار ایستر کونول
**********
ائیلییب شوق وصالین واله و حیران منی
وادی حیره‌تده قویما بیله سرگردان منی
قورخورام سالسین آیاقدان محنت هجران منی
هجر الیند‌ن جانه گلمیش، وصل یار ایستر کونول
**********
پرتو نور خیالینله دولوب صحرای دل
گؤزیاشیم تک موجه گلمیش جوش ائد‌ر دریای دل
طور عشقینده مناجات ائتمگه موسای دل
طاقت و تاب آختاریر، صبر و قرار ایستر کونول
**********
حجله‌گاه قاسمی هر لحظه کیم یاد ائیلر‌م
نی کیمی گلله‌‌م نوایه، داد و فریاد ائیلر‌م
عیش و عشره‌ت مُلکینی، آهیله بر باد ائیلر‌م
چون تن تب‌دار، چشم اشکبار ایستر کونول
**********
خاطریم اولموش پریشان سُنبل و سوسن کیمی
خلقید‌ن کسمیش علایق رشته‌سین سوزن کیمی
چوخ سوئر قبرین چکه، آغوشه پیراهن کیمی
جان وئریب وصله یته پروانه وار ایستر کونول
**********
تند باد هجریله سولموش گلستانیم منیم
غصه‌د‌ن اولموش خزان گلبرگ خندانیم منیم
نطق یوخ دیلد‌ن دوشوب مرغ خوش‌الحانیم منیم
بلبل شوریده‌ تک فصل بهار ایستر کونول
**********
سیل غمد‌ن آز قالیربنیاد جان اولسون خراب
زورق جسمیم او سیل‌ ایچره قالیب مثل حباب
محفل وصلین خیالیله اولوب باغریم کباب
اختیاریم یوخ ندیم، بی‌اختیار ایستر کونول
**********
شور عشقین شهرتی از بس کی عالم‌گیر اولوب
بینوا صرّاف اودور مجنون کیمی ‌زنجیر اولوب
آب و خاک غمله گویا طینَتیم تخمیر اولوب
محنت و درد و مصیبت هر نه وار ایستر کونول
**********
شاعر : مرحوم صرّاف